Բոլոր նրանց համար, ովքեր հետաքրքրված են բիզնես գերմաներենով։ Դասընթացի շրջանակներում ուսուցանվում են մասնագիտական լեզվին վերաբերող կարևոր հմտություններ, բառապաշար՝ կապված առօրյայի և մասնագիտության հետ: Դասընթացն անցկացվում է համապատասխան գրականությամբ։ Մանրամասն տեղեկությունների համար կարող եք զանգահարել՝ 010 283 450, 055 283 450:

«Յունիվերս» լեզվի կենտրոնի հրավերով Հայաստանում հանդիպումների շարք անցկացրեց գերմանական «Կլետ» (Ernst Klett Sprachen) հրատարակչության մեթոդիստ խորհրդատու Ջենիֆեր Մ. Սվանդան: Հանդիպումներն անցան «Յունիվերս» լեզվի կենտրոնի, Երևանում գործող լեզվի ուսուցման այլ կենտրոնների մասնագետների, ինչպես նաև «Զանգակ» հրատարակչության մեթոդիստների մասնակցությամբ:

«Կլետ» հրատարակչությունը շուրջ 20 լեզուներով ստեղծում և զարգացնում է թվային և տպագիր ուսումնական նյութեր և դասագրքեր գերմաներենը որպես օտար լեզու սովորող մեծահասակների, երեխաների և պատանիների համար: «Կլետն» առաջարկում է ուսումնկան և օժանդակ այլ նյութեր՝ նախատեսված ընթերցանության, սերտիֆիկացման համար, ինչպես նաև վերապատրաստման դասընթացներ և սեմինարներ ուսուցիչների համար:

Ջենիֆեր Սվանդան ընդգրկված է «Կլետ» հրատարակչության մի շարք նախագծային խմբերում.

«Մեխանիզմն աշխատում է այսպես. ես արևելյան հատվածի պատասխանատուն եմ: Հավաքում եմ այս երկրներում շրջանառվող գաղափարները, որոնք անհրաժեշտ են գերմաներենի դասագրքերի ստեղծման և զարգացման համար, այսինքն՝ մենք շարունակաբար ճշտում ենք տեղական կարիքները: Դասագրքեր ստեղծելիս հիմնվում ենք «Ժամանակի ոգի» հասկացություն ասվածի վրա, և մյուս կողմից, մեծ նշանակություն ունի այն բնական միջավայրը, որի համար ստեղծվում է դասագիրքը»,- հանդիպմանն ասաց Ջենիֆեր Սվանդան։ 

Հանդիպումների ընթացքում նա ներկայացրեց «Կլետ» հրատարակչության դասագրքերն ու դրանց ստեղծման սկզբունքները նաև տեղական՝ Գերմանիայի շուկայի համար:

«Մենք հետևում ենք հասարակության զարգացումներին և փորձում արագ արձագանքել դրանց: Օրինակ՝ նկատում ենք, որ կան ներգաղթած երեխաներ, որոնք պետք է անցնեն «մաթեմատիկա» առարկան, բայց չեն տիրապետում դասավանդվող լեզվին: Մենք արագ արձագանքում ենք՝ առաջարկելով դասագրքեր նման նպատակային խմբերի համար: Հետևում ենք նաև, թե ինչ կարիքներ ունի Գերմանիայի շուկան: Օրինակ՝ կապված փախստականների հետ, Գերմանիայում բազմաթիվ ինտեգրացիոն ծրագրեր կան՝ և այդ դասընթացները օժանդակություն են ստանում պետական մակարդակով: Դրանք շատ-շատ են, և անհրաժեշտ են ավելի մատչելի  դասընթացներ, ուստի մենք ստեղծել ենք ոչ ակադեմիական մակարդակի համար նախատեսված դասագրքեր գերմաներենը որպես օտար լեզու սովորելու համար»,- ասաց նա։ 

«Զանգակ» գրատների ցանցը այսուհետ Հայաստանում կներկայացնի «Կլետ» հրատարակչության ուսումնական գրքերի տեսականին, հաշվի առնելով այն, որ մինչ օրս լեզվի կենտրոններն ու անհատ մասնագետները անհրաժեշտ մասնագիտական և նորացող գրականությունը հիմնականում ձեռք են բերում դրսից: 

Այդ առիթով Ջենիֆեր Սվանդան նշեց.

«Դեռ չենք ճանաչում, նոր ենք մուտք գործում Հայասստանյան շուկա, և կարծում եմ, որ մեր համագործակցությունը շատ հեռանկարային է լինելու»: 

«Կազա» հիմնադրամի ՄԱԿ ՓԳՀ-ի Հայաստանյան գրասենյակի կողմից ֆինանսավորված ծրագրի շրջանակներում և Universe ուսումնական կենտրոնի նախաձեռնությամբ ապրիլ ամսվանից մեկնարկել են հայերենի դասերը Երևանի «Հատուկ կացարանի» բնակիչների համար: Դասերը նպատակ ունեն համակողմանի և համապարփակ տեղեկություն տրամադրել հայերենի վերաբերյալ և նպաստել փախստականների և ապաստան հայցողների ինտեգրմանը երկրում՝ լեզվի միջոցով: 
Դասերը տեղի են ունենում շաբաթական երկուական անգամ՝ երկու խմբերով: Հայերենը մատուցվում է մատչելի ու հետաքրքիր, ինչի շնորհիվ դասերը վերածվում են նորը իմանալու ու ճանաչելու, դրա մասին զրուցելու ու քննարկելու լավ հնարավորության: Հայերենն ուսանելու շուրջ համախմբումը հնարավորություն է տալիս փախստականներին նաև ծանոթանալու միմյանց հետ, շփվելու ու ցրվելու առօրյա խնդիրներից, իսկ հետաքրքիր խաղերը, արշավներն ու նախաձեռնությունները թույլ են տալիս ճանաչել հայերենն ու Հայաստանը նոր գույներով ու զգացմունքներով: 
Դասերը կազմակերպվում են հատուկ ծրագրով, որն ուղեկցվում է հետաքրքիր խաղերով, նախաձեռնություններով ու արշավներով, իսկ տաք սուրճի և թեյի շուրջ ջերմ, կատակաշատ զրույցներն ու քննարկումները հնարավորություն են տալիս մտերմիկ շփման, ծանոթության ու ընկերական հարաբերությունների հաստատման: